A elaboración dun Plan de Urbanismo impediríalle ao Alcalde "caciquear" cos cambios nas normas de urbanismo
O BNG ESÍXELLE AO ALCALDE A SUSPENSIÓN DA DELIMITACIÓN DE POLÍGONOS QUE AFECTARÁ A MÁIS DE 200 PROPIETARIOS
No pasado mes de marzo, o BNG denunciou publicamente
a actuación do alcalde de Outeiro de Rei, e do Partido Popular, por iniciar un
proceso sen sentido neste momento e moi custoso para todas as persoas
afectadas.
Por decreto da alcaldía, asinado o 6 de
febreiro deste ano, o concello iniciou un proceso para a delimitación de
polígonos urbanos en ámbalas dúas marxes da N-VI ao seu paso por Outeiro de
Rei. Esta actuación obedece a un capricho urbanístico do alcalde, que non
xustifica a necesidade e o motivo de tal actuación en ningunha das memorias de pertinentes,
e que neste momento, só serve para meter á xente en gastos innecesarios.
A actuación programada polo goberno
municipal, entre outras cousas, pretende a creación de dúas vías de servizo e a
súa urbanización nas dúas marxes da N-VI. Este proxecto suporá que osveciños e
veciñas teñan que asumir os custes de urbanización, que perdan parte de seus
terreos e o derrubo de varias vivendas e algún edificio público (o PAC).
Non é de recibo que o alcalde actualice
agora as Normas Subsidiarias aprobadas hai mais de 20 anos, para adaptalas
neste caso, á Lei do Solo do ano 2002, cando se demostran como un instrumento
obsoleto que el cambia a capricho continuadamente, causando un grave prexuízo a
moitos veciños e veciñas.
O goberno municipal co alcalde á cabeza,
actuou cunha falta de transparencia manifesta neste caso, comunicándolle ás
persoas afectadas a súa situación un mes despois de que saíse publicado no BOP
o decreto da alcaldía. Non é comprensible que neste momento de recesión
económica e inmobiliaria lle entre tanta présa por desenvolver a urbanización
da vila, máxime cando xa está no Parlamento Galego un proxecto de modificación
da Lei de Solo que deixará sen
efecto a lei aprobada no ano 2002.
200 SINATURAS OPOÑÉNDOSE AO PROXECTO DO ALCALDE
O pasado mes de maio, o BNG convocou unha
xuntanza informativa, a que acudiron preto de cincuenta veciños e veciñas .
Desta xuntanza saíu unha comisión que foi a encargada da recolleita de sinaturas,
e na que se solicita que o Concello retire a delimitación de polígonos e
desenvolva un Plan Xeral de Ordenación Urbana (PXOM) para todo o concello.
Foron preto de douscentos veciños e
veciñas os que manifestaron a súa oposición á delimitación de polígonos
deseñada polo alcalde, e así o demostraron no escrito presentado no Concello.
O BNG seguirá insistindo no concello para
que deixen este proxecto e se aborde con seriedade, os problemas urbanísticos
que existen no concello, xerados pola política urbanística de favores e caprichos
practicados polo PP.
