Xosé Ferreiro, candidato do BNG en Outeiro de Rei
“As liñas principais do noso
programa electoral xiran en torno a conseguir que todos e todas elas se sintan
como cidadáns no canto de súbditos”
Nome e
apelidos: Xosé
Ferreiro Fernández
Profesión: Licenciado en Física, Profesor
de Matemáticas
- Esta é a
primeira ocasión na que se postula como alcaldable do seu partido. Como afronta estes novos comicios? Con que obxectivos?
Máis que candidato a Alcalde, gústame dicir
que son un membro máis dun equipo que quere cambiar o concello porque creo que
pode mellorar moito. Conseguir un concello democrático, no que todas as veciñas
e veciños teñan as mesmas oportunidades e onde a nosa mocidade non se vexa
obrigada a ter que marchar é o obxectivo que nos dá o ánimo e a ilusión
necesaria para traballar neste proxecto de futuro.
- Cales son
os seus principais puntos do programa electoral?
Aínda faltando as aportacións que recibamos
das veciñas e veciños, as liñas principais xiran en torno a conseguir que todos
e todas elas se sinta como cidadáns no canto de súbditos.
Logo diso, acadar un plan de urbanismo para
impedir que se siga a caciquear en cada momento en función dos intereses do construtor
amigo ou do círculo do Alcalde, dar oportunidades á mocidade para que non teña
que emigrar, loitar contra o desemprego, desenvolver e potenciar o tecido
produtivo e as potencialidades do concello, ampliar, mellorar e facer asumibles
para todos e todas os servizos públicos municipais, tanto no rural como nas
urbanizacións novas, é poñer en valor todo o noso inmenso
patrimonio natural e cultural, son outros eixos do programa no que estamos a
traballar.
- Algunha
actuación concreta para desenvolver nun período determinado?
Conseguir que a Casa do Concello volva a ser
de todas e todos os cidadáns para que a sintan como súa outra vez, traballar
para e coa mocidade a fin de evitar que fuxan do concello e a elaboración do Plan
de Urbanismo feito para o pobo e que non “espante”
as persoas honradas, son puntos que non pode esperar máis.
- No caso de
ser elixido alcalde, que modelo de rexedor seguiría?
Non creo nos líderes individuais. Creo nos
proxectos colectivos. Un Alcalde que estea preto do pobo e que sempre actúe en
conciencia, aínda cando se equivoque, é para min o único modelo de rexedor.
- Como
definiría a xestión do actual rexedor na última lexislatura?
Un goberno feito exclusivamente para beneficio
da xente do entorno do seu partido e das persoas da súa familia e achegadas.
Non hai máis que ver os nomes do persoal que “traballa” para o Concello ou quen obtén as concesións municipais.
- Cre que
deberían estar limitados o número de mandatos na alcaldía?
Non necesariamente. Creo que é unha decisión
dos cidadáns que son os que teñen que avaliar o traballo dos seus gobernantes
co seu voto.
Para o BNG, máis que a limitación dos tempos,
o principal son as políticas que se levan a cabo, independentemente das persoas
que as desenvolven.
- E como
defendería as políticas do seu partido de cara aos veciños e veciñas do
municipio?
Unha sociedade non pode prosperar se non pon
en valor o que é dela, se non se sinte orgullosa do que é, do que ten e de onde
vén.
Esa é a aportación principal do BNG. Non fai
falta que ninguén de fóra nos veña dicir o que temos que facer nin como o temos
que levar a cabo. Polo tanto, non imos aceptar que ninguén nos impoña o xeito
de facer política, nin Madrid, nin Europa, nin quen sexa.
Só estamos ao servizo do noso pobo.
